UrduTech Venus

مکی: جی میل کے تھیمز

مکی — 2008-11-20T22:53:16+00:00

گوگل نے بالآخر جی میل کے لیے خوبصورت تھیم متعارف کروا ہی دیے ہیں.. یہ کوئی تیس عدد تھیمز ہیں جنہیں ترجیحات میں جاکر تبدیل کیا جاسکتا ہے، سروس فی الحال فعال نہیں کی گئی ہے تاہم یہ کچھ ہی دنوں میں فعال کردی جائے گی.. اس سے پہلے جی میل کی شکل کچھ اطلاقیوں کے [...]

مکی: PC میگزین اپنے انجام کو پہنچ گیا

مکی — 2008-11-20T22:42:04+00:00

انٹرنیٹ کی آمد کے وقت سے ہی روایتی اخبارات ورسائل کی بقا کو خطرہ لاحق ہوگیا تھا، یہ خدشہ اس وقت حقیقت کی شکل لینے لگا جب لوگ معلومات اور خبروں کے حصول کے لیے انٹرنیٹ کا استعمال کرنے لگے جس سے روایتی صحافت آہستگی کے ساتھ اپنے انجام کو پہنچنے لگی، اس کا آخری [...]

مکی: فائر فاکس کے add-on ایک بلین ڈاؤنلوڈ

مکی — 2008-11-20T22:27:29+00:00

موزیلا نے اعلان کیا ہے کہ فائر فاکس کے ایڈ اونز کے ڈاؤنلوڈز کی تعداد ایک بلین سے تجاوز کر گئی ہے، موزیلا کے مطابق ایک دن میں ایڈ اونز کے ڈاؤنلوڈ کی تعداد 1.5 ملین ہے اور یہ اعداد وشمار صرف موزیلا کی ویب سائٹ کے ہیں اور جو ایڈ اونز اس ویب سائٹ [...]

میرا پاکستان: کس کا مستقبل روشن؟

ميرا پاکستان — 2008-11-20T20:55:51+00:00

مندرجہ ذیل دو عالمی واقعات پر غور کیجیے اور فیصلہ کیجیے کس کا مستقبل تابناک ہے۔

امریکہ کی آٹو انڈسٹری آجکل معاشی بحران کی لپیٹ میں ہے اور اس کی تپش ہم اپنی فیکٹری میں بھی محسوس کر رہے ہیں۔ آٹو انڈسٹری کا بحران اتنا شدید ہے کہ فورڈ، جنرل موٹرز اور کرائسلر کے چیف کیپیٹل ہل کے دورے پر ہیں جہاں وہ سینٹ کمیٹی کو قائل کرنے کی کوشش کر رہے ہیں کہ انہیں اس وقت حکومتی سرمائے کی شدید ضرورت ہے۔ جنرل موٹرز کے پاس اس وقت صرف چند ماہ کا کیش بچا ہوا ہے، فورڈ موٹر کمپنی صرف اگلے سال تک اپنے اخراجات برداشت کر سکے گی۔

کل کی میٹنگ میں سینٹ کمیٹي نے ان لوگوں کو انتہائی سخت ٹائم دیا۔ حتی کہ ان کے اس دورے کیلیے ذاتی جہازوں پر سفر کو بھی ہدف تنقید بنایا۔ سینیٹروں نے ان سے مستقبل کے پلانز کا پوچھا اور انہیں واضح کر دیا کہ وہ موجودہ سیٹ اپ کیساتھ انہیں پیسہ نہیں دیں گے کیونکہ یہ سیٹ اپ فیل ہو چکا ہے۔

آج کی خبر یہ ہے کہ سینٹ کمیٹي نے تینوں کمپنیوں کو فوری رقم دینے سے انکار کر دیا ہے اور اس معاملے کو دسمبر تک ملتوی کر دیا ہے۔ حالانکہ حکومت کو معلوم ہے اگر یہ تینوں آٹو کمپنیاں بنک کرپٹ ہو گئیں تو ہر دسواں امریکی اپنی نوکری سے ہاتھ دھو بیٹھے گا۔ اس کے باوجود عوامی نمائندے جلد بازی کی بجائے سوچ بچار کو زیادہ ترجیح دے رہے ہیں۔ اکثریت کا خیال ہے کہ پہلے تینوں آٹو کمپنیاں اپنا موجودہ سیٹ درست کریں، اپنے ناکام سربراہوں کے تبدیل کریں اور ایک کامیاب پلان ان کو پیش کریں جو قابل عمل ہو تب انہیں سرکاری پیسہ ملے گا۔

دوسری طرف پاکستان نے آئی ایم ایف سے نو دس بلین ڈالر قرض لیا مگر عوامی نمائندوں کو ہوا تک نہیں لگنے دی۔ بلکہ عوامی نمائندوں نے بھی اس پر احتجاج نہیں کیا اور نہ ہی اسمبلی اور سینٹ کے اجلاس میں اس پر بحث ہوئی ہے۔ اتنی بڑی رقم قرض لینا اور صرف ایک آدمی کے رحم و کرم پر ملک کو چھوڑ دینا کہاں کی عقل مندی ہے۔ ہونا تو یہ چاہیے تھا کہ عوامی نمائندے حکومت سے پوچھتے کہ جو قرض منظور ہوا ہے وہ کہاں خرچ ہو گا اور اس کی ادائیگی کیلیے رقم کہاں سے آئے گی۔ اگر تو قرضہ صنعت لگانے کی بجائے صرف حکومتی اخراجات چلانے کیلیے لیا گیا ہے جس کا امکان زیادہ ہے تو پھر یہ جلد ہی ختم ہو جائے گا اور اس کی ادائیگی کیلیے عوام پر مزید ٹیکس لگا دیے جائیں گے جو اچھی بات نہیں ہے۔

اب آپ فیصلہ کریں کہ کون اپنے ملک کیلیے مخلص ہے؟

جہانزیب: امریکی جرگہ

جہانزیب — 2008-11-20T18:53:44+00:00

کہتے ہیں دو امور انجام دیتے وقت آپ کو امریکی شہری ہونے کا احساس ہوتا ہے، ایک رائے دہی کا حق استعمال کر کے اور دوسرا منصفی کے فرائض انجام دے کر ۔پچھلے مہینے یکے بعد دیگرے ان دونوں امور سے میرا واسطہ رہا ۔
فرائض منصفی یا عرف عام جیوری ڈیوٹی کی امریکی انصاف میں کلیدی حثیت ہے، لیکن اچنبھا تب ہوتا ہے، جب عدالت کی طرف سے آپ کو طلبی کا پروانہ آنا ہے اور آپ اپنے اردگرد جاننے ولے لوگوں سے اس بارے استفسار کریں، تو کوئی درست معلومات نہیں ملتی، لیکن سب ملی معلومات سے آپ ایک نتیجہ اخذ کر سکتے ہیں، کہ عدالت میں مقدمہ پر دونوں طرف فریقین کے دلائل اور ثبوت دیکھ اور سن کر آپ کو فیصلہ سنانا ہوتا ہے، اور عموماً مقدمہ ایک ہفتہ کے اندر ختم ہو جاتا ہے جو غلط نہیں لیکن نا مکمل ہے ۔ امریکہ میں دو مختلف قسم کی جیوری عدالتی امور میں فرائض انجام دیتی ہیں ۔

پیٹٹ یا ٹرائل جیوری ۔
یہ وہ جیوری ہے جس کا ذکر شروع میں کیا تھا،یا ایک عام شخص کے ذہن میں عدالت کا جو تصور ہوتا ہے، جس میں ایک جج، دو وکیل، ملزم، گواہ، پولیس اور ثبوت اور ان کے متعلق مباحث اور دلائل موجود ہوتے ہیں، یہ جیوری نیویارک میں نو سے بارہ افراد پر مشتمل ہوتی ہے، جو سب دلائل سننے کے بعد اپنا فیصلہ سناتے ہیں، جس کی روشنی میں جج سزا یا رہا کرنے کا فیصلہ سناتا ہے ۔ یہ بات یاد رکھیں کہ معصوم یا مجرم کا فیصلہ جیوری کرتی ہے نا کہ جج، اور فیصلے کو جج نہیں بدل سکتا، جج قانون کے مطابق اس پر سزا سناتا ہے ۔اور انصاف کے مراحل میں یہ سب سے آخری مرحلہ ہوتا ہے ۔ٹرائیل جیوری صرف ایک مقدمہ سنتی ہے، اور عموماً چار سے پانچ دن میں اپنے فرائض سے سبکدوش ہو جاتی ہے ۔

گرینڈ جیوری ۔
نیویارک میں گرینڈ جیوری 23 افراد پر مشتمل ہوتی ہے، اور کسی فیصلے پر پہنچنے کے لئے 12 افراد کی حمایت درکار ہوتی ہے، جبکہ کسی بھی مقدمہ پر کم از کم 16 افراد کا موجود ہونا لازمی ہے ۔
ٹرائل جیوری کے برعکس گرینڈ جیوری میں جج، وکیلِ صفائی اور زیادہ تر مقدمات میں ملزم موجود نہیں ہوتا ۔ یہ انصاف کا دوسرا مرحلہ ہے، سب سے پہلے پولیس کسی شخص کو گرفتار کرتی ہے، یا اس کے خلاف ثبوت تیار کرتی ہے، جسے ڈسٹرکٹ اٹارنی آفس میں بھیجا جاتا ہے، ڈسٹرکٹ اٹارنی آفس اس مقدمہ پر ایک وکیل کے فرائض لگاتا ہے، جسے پراسیکیوٹر کہتے ہیں ۔ یہ پراسیکیوٹر مقدمہ گرینڈ جیوری کے سامنے پیش کرتا ہے، مقدمہ میں ثبوت اور گواہان اور پولیس افسران جنہوں نے مقدمہ تیار کیا ہے، جیوری کے سامنے پیش ہوتے ہیں ۔ گرینڈ جیوری نہ صرف ان سب کے دلائل اور ثبوت سنتی ہے، بلکہ سوالات پوچھ سکتی ہے، کسی ابہام کی صورت میں مزید گواہوں کا مطالبہ کر سکتی ہے ۔ لیکن اس سب کے باوجود گرینڈ جیوری مقدمہ میں کسی کو بری یا مجرم نامزد نہیں کر سکتی، بلکہ تمام مہیا کردہ ثبوتوں کی روشنی میں اس بات کا تعین کرتی ہے کہ آیا مقدمہ اس قابل ہے کہ اسے عدالت میں پیش کیا جائے، جہاں پھر ٹرائل جیوری دونوں فریقین کا نکتہ نظر سنے گی ۔ یا پھر مقدمہ کو رد کر دیا جائے، گرینڈ جیوری سے رد کیا جانے والا مقدمہ عدالت میں پیش نہیں کیا جاتا، اور اگر کسی ملزم کو گرفتار کیا گیا ہو، تو وہ اسی وقت آزاد اور اس پر لگائے الزامات واپس لے لئے جاتے ہیں ۔ گرینڈ جیوری ایک مہینے تک فرائض انجام دیتی ہے، اور اس دوران مختلف مقدمات پر شواہد اور ثبوت دیکھتی ہے ۔

جیورر یا منصف بننے کے مرحلے کا آغاز ایک عدد خط سے ہوتا ہے، جو آپ کو جس ریاست میں آپ میں رہائش پذیر ہیں کے محکمہ انصاف کی طرف سے جاری کیا جاتا ہے، یہ ایک عام سا خط ہوتا ہے لیکن پندرہ دن کے اندر اس کا جواب دینا لازم ہے، اس خط کے جواب میں آپ اپنی معلومات لکھتے ہیں، اور یہ بتاتے ہیں کہ آیا آپ جیوری ڈیوٹی انجام دینا چاہتے ہیں کہ نہیں؟ اور اگر نہیں تو کیوں، وجوہات میں امریکی شہری نہیں، انگریزی بول اور سمجھ نہیں سکتا، یہ انکار کی سب سے سہل وجوہات ہیں، اگر آپ پر ان کا اطلاق نہیں ہوتا تو پھر آپ دیگر وجوہات کے خانہ میں اپنی معذوری کی وجہ بیان کر سکتے ہیں، جیسے ایک ماں جس پر ۱۲ سال سے کم عمر کے بچوں کی ذمہ داری ہے اس سے مستثنیٰ ہے ۔ مجھے پچھلے پانچ سال سے یہ خطوط آ رہے تھے، پہلے میں امریکی شہری نہیں تھا، بہت سے دیسی دوسری ترجیع کا استعمال بھی کرتے ہیں، لیکن اب یہ اتنی قابل قبول نہیں کہ امریکی شہری بننے کی ایک شرط انگریزی بھی ہے ۔

یہ کرنے کے بعد آپ جب سب کچھ بھول جاتے ہیں، تو ایک عدد خط اور آ جاتا ہے، لیکن یہ طلبی کا پروانہ ہوتا، جس میں اپنے علاقے کی سپریم کورٹ میں کمشنر آف جیوررز کے آفس میں بقلم خود جانا ہوتا، اس کے لئے بھی آپ کے پاس پندرہ دن ہوتے ہیں ۔وہاں ایک دفعہ پھر آپ اپنی معلومات دیتے ہیں، اور اگر جیوری ڈیوٹی نہیں کر سکتے تو اپنا عذر پیش کرتے ہیں ۔
تیسرے مرحلہ میں پکے وارنٹ مطلب عدالت کی طرف سے طلبی کا نوٹس آتا ہے، جہاں پر دن، وقت اور مقام بتایا گیا ہوتا ہے، اور آپ کس قسم کی جیوری میں فرائض انجام دیں گے لکھا ہوتا ہے ۔
مقررہ دن حاضر ہونے پر، عدالتی عملہ آپ کو خوش آمدید کہتا ہے، میرے ساتھ 150 افراد اور لوگ بھی موجود تھے، سب لوگوں کے آ جانے پر ایک جج فرائض ادا کرنے پر آپ کا شکریہ ادا کرتا ہے، اور گرینڈ جیوری کے متعلق ابتدائی معلومات دیتا ہے، اور پھر جیوری کا چناو کرتا ہے ۔ ہم 150 لوگوں میں سے چھ عدد جیوررز کے پینل بنائے گئے، ہر پینل 23 افراد پر مشتمل تھا، یعنی 12 افراد کو پینل میں نہیں چنا گیا، یہ اضافی لوگ، کسی کے نہ آنے کی صورت میں بلوائے جاتے ہیں ۔چناؤ کے لئے سب کے نام ایک ڈبے میں ڈال کر، باری باری ایک ایک نام نکالا جاتا ہے ۔ ہر پینل باری باری ایک مہینہ تک فرائض انجام دیتا ہے ۔ اس کے بعد جس پینل میں آپ کا انتخاب ہوا ہو، اس کی مقرر کردہ تاریخ پر آپ کو واپس عدالت جانا ہونا ہے ۔
مقررہ تاریخ کو پہلا دن تو صرف ویڈیوز دیکھتے، گزر جاتا ہے، اس کے علاوہ کمشنر آف جیوررز آپ کو فرائض کے بارے میں بتاتا ہے، اور اسکی اہمیت کو انصاف کے حصول کے لئے اجاگر کرتا ہے، ساتھ میں آپ کو ایک عدد کتابچہ فراہم کیا جاتا ہے، جس میں وہی باتیں دوبارہ لکھی ہوتی ہیں ۔
اصل کام اگلے دن سے شروع ہوتا ہے، پراسیکیوٹر، ایک عدد سٹینوگرافر کے ساتھ وارد ہوتا ہے، اور اپنا کیس پیش کرتا ہے، اس کے بعد گواہان کو ایک ایک کر کے سامنے لایا جاتا ہے، جیوری سب کو سنتی ہے، ان کے بیانات کا موازنہ کرتی ہے، مزید سوالات پوچھتی ہے، اور اگر پھر بھی کچھ واضح نہ ہو تو مزید گواہ طلب کر سکتی ہے، لیکن ایسا کرنے کے لئے 12 افراد کی حمایت ہونا لازمی ہے ۔ ایک اور بات جو گرینڈ جیوری میں ہے، فرض کریں پہلا پراسیکیوٹر پہلا مقدمہ لاتا ہے، اور ساتھ ایک گواہ پہلے دن پیش کرتا ہے، لیکن ہو سکتا ہے مقدمہ میں دوسرا گواہ ایک، یا دو ہفتہ بعد آئے، تو مقدمات کو گڈمڈ کرنے کی بجائے گرینڈ جیورر ہر مقدمے کے نوٹس تیار کرتے ہیں، ایک مقدمہ پر تمام ثبوت مکمل ہونے پر، پراسیکیوٹر جیوری سے ووٹنگ کی درخواست کرتا ہے، لیکن جب جیوری ووٹنگ کے مرحلہ میں ہو، تو سوا جیوری کے کسی بھی فرد کو جیوری کے کمرہ میں موجود ہونے کی اجازت نہیں، یہاں سب جیوررز بحث کرتے ہیں، پھر ووٹ دے کر کہ مقدمہ کو آگے بھیجا جائے یا یہیں خارج کر دیا کا فیصلہ کرتے ہیں ۔
اس ایک مہینے میں ہمارے پینل نے 81 مقدمات سنے، اور اسی معاشرے میں رہتے ہوئے جو تصویر آپ کی آنکھوں سے اوجھل ہوتی ہے، کا بغور مشاہدہ کیا ۔جب آپ جیوری روم میں بیٹھے ہوتے ہیں تو اکثر اوقات منظر جذباتی ہوتا ہے، مثلاً ایک مقدمہ ہمارے پاس آیا جس میں ایک لڑکی جب نو سال کی تھی، تب سے اس کا باپ اسے جنسی زیادتی کا نشانہ بنا رہا تھا، اور اس وقت اسکی عمر 17 سال تھی ۔ اس مقدمہ سے پہلے میں سوچتا تھا کہ جن خواتین کو جنسی زیادتی کا نشانہ بنایا جاتا ہے وہ عدالت کا رخ کیوں نہیں کرتی ہیں؟ اور جواب مقدمہ دیکھ کر مل گیا، کہ انہیں دہری تکلیف سے گزرنا پڑتا ہے۔
مجموعی طور پر یہ بہت اچھا تجربہ تھا، جہاں آپ کو محسوس ہوتا ہے، کہ ملک کی اصل طاقت عوام کے ہاتھ میں ہے ۔

وارث: فیض مرحوم کی برسی اور انکی خوبصورت فارسی نعت مع ترجمہ

محمد وارث — 2008-11-20T17:39:52+00:00

آج فیض احمد فیض مرحوم کی چوبیسویں برسی ہے، آج کے دن اقلیمِ سخن کا ایک اور فرمانروا ہم سے بچھڑ گیا۔

ع - خاک میں، کیا صُورتیں ہوں گی کہ پنہاں ہو گئیں

ہمارا شہر سیالکوٹ اگر شہرِ اقبال کہلاتا ہے تو یہ شہر فیض کے فیض سے بھی فیضیاب ہے کہ شہرِ فیض بھی ہے گویا کہ ایک اور “سودائی” کا شہر۔ اقبال اور فیض میں سیالکوٹ کے علاوہ شمس العلماء مولوی سید میر حسن کا ذکر بھی قدرِ مشترک کے طور پر کیا جاتا ہے کہ آپ دونوں کے استاد تھے لیکن ایک اور بہت اہم قدرِ مشترک جس کا ذکر عموماً نہیں کیا جاتا وہ پروفیسر یوسف سلیم چشتی ہیں۔ پروفیسر صاحب اقبال کے سب سے بڑے شارح و مفسر اور ایک طرح سے دوست شاگرد تھے کہ اقبال کے کلام کے مطالب خود اقبال سے مدتوں تک سمجھے اور فیض کے وہ استاد تھے بلکہ اگر یوں کہا جائے کہ پروفیسر چشتی نے اردو دنیا کو فیض کا فیض عطا کیا تو غلط نہ ہوگا۔ فیض احمد فیض خود فرماتے ہیں۔

“جب دسویں جماعت میں پہنچے تو ہم نے بھی تک بندی شروع کر دی اور ایک دو مشاعروں میں شعر پڑھ دیے۔ منشی سراج دین نے ہم سے کہا میاں ٹھیک ہے تم بہت تلاش سے شعر کہتے ہو مگر یہ کام چھوڑ دو، ابھی تو تم پڑھو لکھو اور جب تمھارے دل و دماغ میں پختگی آ جائے تب یہ کام کرنا۔ اس وقت یہ تضیعِ اوقات ہے۔ ہم نے شعر کہنا ترک کر دیا۔ جب ہم مَرے کالج سیالکوٹ میں داخل ہوئے اور وہاں پروفیسر یوسف سلیم چشتی اردو پڑھانے آئے جو اقبال کے مفسر بھی ہیں، تو انہوں نے مشاعرے کی طرح ڈالی اور کہا طرح پر شعر کہو۔ ہم نے کچھ شعر کہے اور ہمیں داد ملی۔ چشتی صاحب نے منشی سراج الدین کے بالکل خلاف مشورہ دیا اور کہا فوراً اس طرف توجہ کرو، شاید تم کسی دن شاعر ہو جاؤ۔”

فیض کے کلیات “نسخہ ھائے وفا” میں شامل آخری کتاب “غبار ایام ” کا اختتام فیض کی ایک خوبصورت فارسی نعت پر ہوتا ہے اور شاید کلیات میں یہ واحد نعت ہے۔ بہت دنوں سے ذہن میں تھا کہ اس نعت کو لکھوں اور آج فیض کی برسی کے موقعے پر اس خوبصورت نعت کر مع ترجمہ پوسٹ کرنے کی سعادت حاصل کر رہا ہوں۔

اے تو کہ ہست ہر دلِ محزوں سرائے تو
آوردہ ام سرائے دِگر از برائے تو

اے کہ آپ (ص) کا ہر دکھی دل میں ٹھکانہ ہے، میں نے بھی آپ کے لیے ایک اور سرائے بنائی ہے یعنی کہ میرے دکھی دل میں بھی آپ کا گھر ہو جائے۔

خواجہ بہ تخت بندۂ تشویشِ مُلک و مال
بر خاک رشکِ خسروِ دوراں گدائے تو

تخت پر بیٹھا ہوا شاہ ملک و مال کی تشویش میں مبتلا ہے، جبکہ خاک پر بیٹھا ہوا آپ کا گدا وقت کے شاہنشاہ کے لیے بھی باعثِ رشک ہوتا ہے۔

آنجا قصیدہ خوانیِ لذّاتِ سیم و زر
اینجا فقط حدیثِ نشاطِ لِقائے تو

وہاں (دنیا داروں کے ہاں) سونے اور چاندی کی لذات کے قصیدے ہیں جب کہ یہاں (ہم خاکساروں کے ہاں) فقط آپ کے دیدار کے نشاط کی باتیں ہیں۔

آتش فشاں ز قہر و ملامت زبانِ شیخ
از اشک تر ز دردِ غریباں ردائے تو

شیخ ( اور واعظ) کی زبان قہر اور ملامت سے آتش فشاں بنی ہوئی ہے جبکہ غریبوں کے درد کی وجہ سے آپ کی چادر مبارک آپ کے آنسو سے تر ہے۔

باید کہ ظالمانِ جہاں را صدا کُنَد
روزے بسُوئے عدل و عنایت صدائے تو

ضروری ہے کہ دنیا کے ظالم (جوابی) صدا کریں، ایک (کسی) دن عدل و عنایت کی طرف (لے جانے والی) آپ کی آواز پر یعنی آپ کی عدل و عنایت کی طرف بلانے والی آواز پر ظالموں کو لبیک کہنا ہی پڑے گا۔

ShareThis

شعیب صفدر: ہیلو! گداگر

شعیب صفدر — 2008-11-20T16:47:58+00:00

حکیم خالد: پاکستان سمیت دنیا بھر میں آج عالمی یوم اطفال منایا جا رہا ہے

hakimkhalid — 2008-11-20T14:32:19+00:00

بچوں میں امراض کی بنیادی وجہ ماحولیاتی آلودگی ہے: قاضی ایم اے خالد

دنیا بھر میں پچاس لاکھ بچے ہرسال مختلف امراض کا شکار ہوکر ہلاک ہوجاتے ہیں

ماحولیاتی آلودگی سے ملیریا ‘اسہال’ہیضہ ‘یرقان خصوصاًہیپاٹایٹس اور دیگرامراض میں مسلسل اضافہ ہو رہا ہے

پینے کے پانی اور ماحو ل کی آلودگی دور کرکے ہم بیشتر امراض سے بچ سکتے ہیں

ملک کی 76فیصد آبادی طب یونانی کے معالجین کی خدمات سے مستفید ہورہی ہے: کونسل آف ہربل فزیشنز پاکستان

لاہور(نما ئندگان الیکٹرانک و پرنٹ میڈیا )بچوں کے حقوق کے تحفظ ‘تعلیم’فلاح و بہبود اور ان کی صحت و امراض کے حوالے سے شعور و آگاہی کے جذبے کے ساتھ پاکستان سمیت دنیا بھر میںبچوں کا عالمی دن منایا جا رہا ہے ۔ بچوں میں سانس کی تکالیف اور دیگر امراض کی بنیادی وجہ فضائی آلودگی ہے ہرسال پانچ سال سے کم عمر کے دو ملین بچے سانس کی امراض سے ہلاک ہو جاتے ہیںجبکہ سینے کی انفیکشن ٹریفک کے دھوئیں میں شامل کاربن مونو آکسائیڈاور سیسے وغیرہ کی کثافت سے وقوع پذیر ہورہی ہے۔ عالمی ادارہ صحت کے مطابق دنیا بھر میں 14سال تک کی عمر کے پچاس لاکھ بچے ہرسال مختلف امراض کا شکار ہوکر ہلاک ہوجاتے ہیں یہ ننھے پھول خاص طور پر ملیریا ‘ہیضہ’اسہال اور سانس کی بیماریوںمیں مبتلاء ہوتے ہیں جس کی بڑی وجہ ماحولیاتی آلودگی ہے ۔ان باتوں کا اظہار یونانی میڈیکل آفیسر اور مرکزی سیکرٹری جنرل کونسل آف ہربل فزیشنز پاکستان حکیم قاضی ایم اے خالد نے عالمی یوم اطفال کے حوالے سے ملکی و غیرملکی میڈیا سے بات چیت کرتے ہوئے کیا۔ انہوں نے کہا کہ وطن عزیز میں ملیریا ‘اسہال’ہیضہ ‘یرقان خصوصاًہیپاٹایٹس بی اور سی وغیرہ کی شکایات میں مسلسل اضافہ ہو رہا ہے جس کے تدارک کی سب سے بہتر صورت پینے کے پانی اور ماحو ل کی آلودگی کو دور کرناہے۔ سڑکوں کے کنارے کوڑے کرکٹ کے ڈھیر’ہسپتالوں کا کچرا ‘سرنجیں’استعمال شدہ بوتلیں’مضرِصحت کیمیائی کچرا’کارخانوں سے خارج ہونے والا مہلک دھواںاور زہریلی گیسوں وغیرہ سے بچے مختلف امراض خاص طور پر سانس کی بیماریوں اورجِلدی شکایات میں مبتلاء ہوجاتے ہیںاکثر بچو ں کامعمولی نزلہ زکام بگڑکر شدید کھانسی’دمے اور نمونئے کا باعث بن جاتا ہے۔ معالجین کا کا م صرف علاج کرنا ہی نہیںبلکہ عوام میں شعورِصحت بیدار کرنا بھی ان کی ذمہ داری ہے ورلڈ ہیلتھ آرگنائزیشن اور دیگر عالمی و قومی اداروں کی رپورٹس کے مطابق ملک کی76فیصد آبادی طب مشرقی(اسلامی)کے معالجین کی خدمات سے مستفید ہورہی ہے اس سلسلے میں یہ معالجین بچوں کیلئے محفوظ ماحول کی فراہمی میں اہم کردار ادا کرسکتے ہیں ان کی خدمات سے استفادہ حکومت کابھی اولیں فرض ہے ۔ ماحولیاتی آلودگی کے خاتمے کیلئے شعور پیداکرنے کے ساتھ ساتھ عملی اقدامات بھی کرنا ہوں گے تبھی ہم اپنے بچوں کو مستقبل کی خوبصورت زندگی فراہم کرسکتے ہیں۔

اردو لطائف: بارہ بارہ

منتظم — 2008-11-20T13:18:56+00:00

ایک پاگل کنویں کے کنارے کھڑا “بارہ بارہ” گن رہا تھا۔ ایک آدمی کو تجسس ہوا اور اس نے پاگل کے پاس آکر کنویں میں جھانک کر دیکھنے کی کوشش کی کہ پاگل کونسی چیز کی گنتی کر رہا ہے۔ جونہی آدمی نے کنویں میں جھانکا، پاگل نے اسے پیچھے سے دھکا دیا اور گننے لگا “تیرہ تیرہ”۔

خاور کھوکھر: آیت مصطفے

خاور کھوکھر — 2008-11-20T11:07:00+00:00

چھبیس آگست دوهزار آٹھ کو
ایت مصطفے کی میں پیڈائیش کے بعد آیت مصطفے کی پرورش کی مصروفیت کی وجه سے
نیٹ کو صرف پڑھنے کی حد تک هی استعمال کررها هوں

آیت مصطفے

شگفتہ: منتخب کلام

شگفتہ — 2008-11-20T09:52:03+00:00

زندگی کے چہرے کا
نقش جب بگڑ جائے
دوستوں کی آنکھوں میں
دشمنی ابھر آئے
کانچ کی سنہری بات
زیرِ لب بکھر جائے
سخت بے ثباتی ہو
بات بات ذاتی ہو
اس طرح کے موسم میں
آئینہ ضروری ہے

ShareThis

راشد کامران: ہولی کاؤ

راشد کامران — 2008-11-20T07:55:53+00:00

اصل فقرہ اتنا ’ہولی‘ نہیں ہے، اچانک کوئی عجیب چیز دیکھ کر عام طور پر امریکیوں کا رد عمل اسی طرح کا ہوتا ہے۔ گائے کا استعمال البتہ محدود ہے، گوبر اور اس سے ملحقہ اعضاء بکثرت استعمال کیے جاتے ہیں آگے آپ سمجھدار ہیں۔ یونہی انٹرنیٹ گردی کرتے ہوئے پاک فیکٹ کی ایک پوسٹ پر نظر پڑی تو ہمارے دہن سے بھی دو لفظی حیرانگی ٹپک پڑی۔
عموماَ نئے لکھنے والے بلاگرز کو پرانے لکھاری مشورہ دیتے ہیں کہ اول تو دوسروں کی تحریروں کے ریفرنس سے کام چلائیں اور اگر مکمل مضمون کا ’چھاپا‘ ضروری ہو تو ماخذ کی پوری تفصیل ضرور لکھیں، لیکن صاحب یہاں تو قیمت سات روپے روزانہ چھپنے والے اخبارات کی ’جسارت‘ کا یہ حال ہے کہ پورا مضمون ’صحافتی‘ آزادی کی صریح تشریح۔ کیا آپ کو بی بی سی کا حوالہ نظر آیا؟ یا جو کچھ انٹرنیٹ پر ہے مال غنیمت ہے؟

افتخار اجمل: حقوق انسانی ۔ ماضی اور حال

افتخار اجمل بھوپال — 2008-11-20T07:24:45+00:00

رومی صاحب نے ایک اچھا نظریہ پیش کیا ہے کہ انسانیت کے تحفظ کے لئے کام کیا جائے ۔ امید ہے قارئین رومی صاحب کے منصوبے کواپنی ذاتی کاوشوں سے عملی جامہ پہنائیں گے اور اسے اس پیرائے میں نہیں لیں گے جس میں آجکل اسی طرح کے اعلانات کو لیا جاتا ہے جو کھوکھلے نعرے اور ٹی پارٹی یا ڈنر کے سوا کچھ نہیں ہوتے

ہمارے موجودہ معاشرہ کو دیکھا جائے تو سائینس کا یہ اصول سامنے آتا ہے کہ جس چیز پر زیادہ زور ڈالا جائے وہ ٹوٹ جاتی ہے ۔ میرے خیال میں اس اصول کا اطلاق ہر عمل پر ہوتا ہے ۔ دور حاضر میں انسانی حقوق اور ان کی حفاظت پر اتنا زور ڈالا گیا ہے کہ انسانیت کا جنازہ ہی نکل گیا ہے ۔ اسے اعتراض نہ سمجھئے گا میں صرف وضاحت کی کوشش کر رہا ہوں ۔

دنیا کی ترقی کے ساتھ علم وسیع ہوا اور اس کی ان گنت شاخیں بن گئیں ۔ پہلے ناک کان اور گلے کی بیماریوں کا
ایک ہی طبیب ہوتا تھا تو مریض جلدی فارغ ہو جاتا تھا ۔ پھر ہر ایک کا الگ یعنی تین طبیب ہو گئے اور مریض کو دو یا تین گنا وقت دینا پڑا ۔ سنا ہے کہ اب ناک کے بائیں حصے کا الگ ہے اور داہنے حصے کا الگ ۔

آپ سوچ رہے ہونگے کہ کیا الا بلا لکھ رہا ہوں ۔ محترم ۔ بات یہ ہے کہ دور حاضر کا انسان ستائشی ہے اور دور حاضر کے اجارہ داروں نے انسانیت کی بھی متعدد تعریفیں بنا دیں ہیں ۔ اسی لئے رومی صاحب کو لکھنا پڑا

“ہم صرف انسانوں کا ہی نہیں ، جانوروں ، بے جان اشیا اور پودوں کا بھی تحفظ چاہتے ہیں”

دد اصل ۔ انسان ہوتا ہی وہ ہے جو ہر جاندار اور بے جان کے حقوق کی حفاظت ذاتی خواہشات پر مقدم رکھتا ہے ۔ اسی کا نام ہے تحفظ حقوق انسانی ۔

جب میں بچہ تھا اس زمانہ میں اگر چیونٹیاں زمین پر چلتی نظر آ جائیں تو ہمارے بزرگوں میں سے کوئی کہتا کہ ایک چٹکی آٹا لے کر چیونٹیوں کے قریب ڈال دو تاکہ انہیں خوراک کیلئے پشیماں نہ ہونا پڑے ۔ قریب ہر گھر کی چھت پر دو ڈبے یا رکابیاں لٹکی ہوتیں ایک میں دانہ یا چوگا اور دوسرے میں پانی تا کہ پرندے بھوکے پیاسے نہ رہیں ۔ علی ہذا القیاس ۔ اس زمانہ میں انسانی حقوق کا رولا نہیں تھا ۔ اب انسانی حقوق کا رولا ہر طرف ہے مگر چونٹیاں تو چونٹیاں انسانوں کو بھی روندا اور مسلا جا رہا ہے ۔

نعمان علی: اردو کی آخری کتاب - کھانا خودبخود پک رہا ہے

نُعمان علی — 2008-11-20T03:36:25+00:00

دیکھنا۔ بیوی آپ بیٹھی پکا رہی ہے۔ ورنہ دراصل یہ کام میاں کا ہے۔ ہر چیز کیا قرینے سے رکھی ہے۔ دھوئے دھائے برتن صندوق پر چُنے ہیں تاکہ صندوق نہ کھل سکے، ایک طرف نیچے اوپر مٹی کے برتن دھرے ہیں۔ کسی میں دال ہے اور کسی میں آٹا، کسی میں چوہے، پھکنی اور پانی کا لوٹا پاس ہے تاکہ جب چاہے آگ جلائے، جب چاہے پانی ڈال کر بجھا دے۔ آٹا گندھا رکھا ہے، چاول پک چکے ہیں۔ نیچے اتار کر رکھے ہیں۔ دال چولہے پر چڑھی ہے۔ غرض یہ کہ سب کام ہوچکا ہے۔ لیکن یہ پھر بھی پاس بیٹھی ہے۔ میاں جب آتا ہے تو کھانا لا کر سامنے رکھتی ہے۔ پیچھے کبھی نہیں رکھتی، کھا چکتا ہے۔ تو کھانا اُٹھا لیتی ہے۔ ہر روز یوں نہ کرے تو میاں کے سامنے ہزاروں رکابیوں کا ڈھیر لگ جائے۔ کھانے پکانے سے فارغ ہوتی ہے تو کبھی سینا لے بیٹھی ہے۔ کبھی چرخہ کاتنے لگتی ہے، کیوں نہ ہو، مہاتماگاندھی کی بدولت یہ ساری باتیں سیکھی ہیں۔ آپ ہاتھ پاؤں نہ ہلائے تو ڈاکٹر سے علاج کروانا پڑے۔

-از پطرس کے مضامین -

مکی: find اور xargs کے امتزاج سے فائلیں حذف کریں

مکی — 2008-11-19T23:28:31+00:00

فائنڈ find کمانڈ جیسا کہ اس کے نام سے ہی واضح ہے کہ یہ فائلوں اور فولڈروں کو تلاش کرنے کے لیے استعمال ہوتی ہے جبکہ xargs کمانڈ اسے دی جانے والی کسی کمانڈ کی تکرار کرتا ہے.. فرض کریں کہ آپ کسی فولڈر اور اس میں موجود دیگر تمام فولڈروں میں سے “~” کی علامت [...]

جہانزیب: اردو بلاگ ایوارڈ

جہانزیب — 2008-11-19T19:34:05+00:00

منظر نامہ کی طرف سے اردو بلاگ ایوارڈ کا اجراء بالاخر کر دیا گیا ہے، فی الوقت نامزدگی کے مراحل طے کر کے، ہر زمرے میں تین عدد بلاگزر کے نام تجویز کئے گئے ہیں، جن پر ووٹنگ کا مرحلہ جاری ہے ۔ اگر آپ اردو بلاگران حضرات و خواتین کے بلاگ پڑھتے ہیں تو ووٹنگ میں اپنا حصہ ڈال کر ان کی حوصلہ افزائی کریں ۔
علاوہ دیگر اردو بلاگران سے گذارش ہے کہ اپنے بلاگ پر اس کی تشہیر کریں، تا کہ زیادہ سے زیادہ لوگ ووٹنگ میں اپنا حصہ ڈال سکیں ، میں نے ایک عدد گرافک تیار کی ہے، جو ذیل میں موجود ہے، پسند کے سائز والے بینر کے نیچے دیے گئے کوڈ کو کاپی کر کے آپ اپنے بلاگ پر لگا سکتے ہیں ۔

<a href="https://survey.mamut.com/s;jsessionid=847E63E4806779E9CD14EAAA37D2BFED?s=10408"><img src="http://farm4.static.flickr.com/3219/3044207694_3e443de02c_o.png" alt="ووٹ دیجیئے" /></a>

<a href="https://survey.mamut.com/s;jsessionid=847E63E4806779E9CD14EAAA37D2BFED?s=10408"><img src="http://farm4.static.flickr.com/3249/3043376743_cebf3a26f9_o.png" alt="ووٹ دیجیئے" /></a>

منیر احمد طاہر: بجلی چور

پاکستانی — 2008-11-19T15:29:07+00:00

میرا پاکستان: گلوبل دنیا اور بین الاقوامی بنیے

ميرا پاکستان — 2008-11-19T14:31:14+00:00

جیسا کہ سب جانتے ہیں کہ میڈیا اور ٹرانسپورٹ نے دنیا کو سمیٹ کر رکھ دیا ہے۔ اب آپ دنیا کے ایک کونے سے دوسرے کونے میں ایک دن میں پہنچ جاتے ہیں اور میڈیا آپ کو دنیا کے کونے کونے سے منٹ منٹ کی خبریں پہنچا رہا ہے۔ اتنی ترقی کیساتھ ساتھ لوگوں کو غلام بنانے کا رواج بھی بین الاقوامی سرحدیں عبور کر چکا ہے۔

پہلے لوگ جسمانی غلام بنایا کرتے تھے پھر بنیے میدان میں آگئے اور انہوں نے لوگوں کو معاشی طور پر غلام بنانا شروع کر دیا۔ لوگ تب بھی بیوقوف تھے اور اب بھی بیوقوف ہیں۔ تب لوگ اپنی زمینیں رہن رکھ اپنے بال بچوں کی شادیوں، مقدموں اور پیشیوں جیسے غیرترقیاتی اخراجات کیلیے رقم ادھار لیا کرتے تھے۔ اب حکومتیں اپنے لوگوں کو غلام رکھ کر غیرترقیاتی اخراجات کیلیے قرضے لیتی ہیں۔ پہلے ہر گاؤں میں ایک آدھ بنیا ہوا کرتا تھا اب دنیا میں ایک آدھ بنیا ہے جسے ورلڈ بنک اور آئی ایم ایف کا نام دیا گیا ہے۔

یہ بنیا بھی ترقیاتی اخراجات کی بجائے غیرترقیاتی اخراجات کیلیے قرضے دینا پسند کرتا ہے۔ اسےصرف اپنے سرمائے کی فکر ہوتی ہے اور اس بات کی پرواہ نہیں کہ قرضہ لینے والے ملک کے عوام پر کیا گزرے گی۔ حکومتیں اس بنیے کیلیے کام کرتی ہیں یعنی وہ قرضے لینے اور ان کی بمع سود واپسی کی ضمانت دیتی ہیں۔

شاہراہوں پر ٹول ٹیکس، اشیائے صرف پر جنرل سیلز ٹيکس، پراپرٹی ٹيکس، انکم ٹيکس، گاڑیوں کی خریدوفروخت پر ٹیکس اور اسی طرح کے دوسرے ٹیکس آئی ایم ایف کے قرضوں پر سود کی ادائیگی کیلیے اکٹھے کیے جاتے ہیں۔ اس خدمت کے بدلے آئی ایم ایف کا بنیا سرکاری کارندوں کو کچھ عوامی ٹیکسوں کی رقم خرد برد کرنے کی اجازت بھی دے دیتا ہے۔ یہی وجہ ہے کہ اس بنیے کو اس سے کوئی سروکار نہیں کہ ملکوں میں کرپشن کتنی ہے اسے صرف اس بات سے سروکار ہے کہ حکومتیں کتنے زیادہ ٹیکس بڑھا کر اس کا سود ادا کرتی ہیں۔

اگر حکومتوں کی عوام سے ہمدردی یا مخلص پن دیکھنا ہو تو پھر یہ دیکھیے کہ انہوں نے اپنے دور میں کتنے غیرترقیاتی کاموں کیلیے قرضے لیے اور کتنے ترقیاتی کاموں کیلیے۔ اس فارمولے کی بنیاد پر موجودہ حکومت کی عوامی ہمدردی جانچنے کیلیے زیادہ تردد نہیں کرنا پڑے گا۔ حکومت نے پچھلے ہفتے جو قرضہ آئی ایم ایف سے لیا ہے وہ کسی ترقیاتی کام کیلیے نہیں لیا بلکہ سرکاری اخراجات چلانے کیلیے لیا ہے۔ آئی ایم ایف کو سود کی ادائیگی کی ضمانت کے طور پر حکومت نے مزید ٹیکس لگانے کا وعدہ کیا ہو گا۔ تیل کی قیمتوں میں معمولی کمی اسی معاہدے کی ایک شق ہو گی۔ اس کے علاوہ بھی منافع بخش صنعتوں کی نجکاری بھی معاہدے کا حصہ ہو سکتی ہے۔

شاکر عزیز: سرجی

دوست — 2008-11-19T13:13:05+00:00

آج کل میں پھر سر جی بنا ہوا ہوں۔ روزی روٹی کے لیے بننا پڑتا ہے۔ ایک سٹوڈنٹ بندہ اس کے علاوہ اور کسی طرح کما بھی نہیں سکتا۔ اور اللہ جھوٹ نہ بلوائے جتنا پیسا اس انڈسٹری یعنی ایجوکیشن انڈسٹری میں ہے اور کسی چیز میں نہیں۔ آپ کی سرمایہ کاری کی سوفیصد واپسی کی ضمانت کے ساتھ بے انتہا منافع کی گارنٹی ہر چیز موجود ہے اس فیلڈ میں۔

تو میں آج کل ٹیوشن پڑھا رہا ہوں۔ محلے کے ہی ایک دو بچے ہیں جو میرے پاس پڑھنے آتے ہیں۔ نالائق اتنے ہیں کہ بس حق ادا کردیتے ہیں اس صفت کا۔ بڑا بھائی دسویں میں ہے نویں کی دو عدد سپلیوں کے ساتھ، انگریزی اور ریاضی میں۔ اور میرے پاس ریاضی ہی پڑھتا ہے۔ ساتھ انگریزی کا بھی کبھی پوچھ لیتا ہے۔ آج کہنے لگا سرجی فیشن اور ڈریم پر پیرا گراف لکھ دیں گے؟

میں نے کہا کرنا کیا ہے کہتا پرچے میں ان میں سے ایک لازمی آجاتا ہے اس لیے یاد کرنے ہیں۔ میں نے کہا پائلٹ سپر ون سے کرلو تو بولا وہاں مشکل لکھے ہوئے ہیں۔ میں نے کہا مضامین کا کیا کرو گے تو بولا وہ سکول والے سر تین لکھ کر دے دیں گے جن میں سے ایک آجاتا ہے۔

پھر بولا کوئی خط نہیں مل سکتا جو سارے خطوں میں لکھا جاسکے۔ پندرہ خط ہیں، ایک لڑکے کے پاس ایسا خط تھا جو ہر مضمون پر پورا اترتا تھا اور اس نے انگریزی پاس بھی کرلی ہے۔

میں نے اس کی طرف دیکھا، سوچا اور پھر سر جھکا لیا۔۔ اور بولا ابھی تو نہیں لکھا لیکن دیکھتا ہوں شاید کسی سے مل جائے ایسا خط۔

یہ حقیقت ہے کہ بی اے تک ایسے ٹوٹکے چلتے ہیں۔ ایک خواب نامی مضمون میں ایکسیڈنٹ کو گھسیڑ کر دو مضمون بنا لیے جاتے ہیں۔ میں سڑک کے کنارے جارہا تھا کہ میں نے ایک بس کو آتے دیکھا۔ پھر ایکسیڈنٹ ہوا اور پھر آخر میں ہڑبڑا کر اٹھ بیٹھا پتا چلا یہ تو خواب تھا۔ اب اگر خواب والا آجائےتو سارا لکھ دو ورنہ آخری حصہ نکال دو۔ خط ایک ہوتا ہے، لیکن اس کا مضمون ایسا مبہم ہوتا ہے کہ پندرہ بیس عنوانات تلے آجاتا ہے۔ شاگرد خوش ہوجاتے ہیں، استاد کو پیسے مل جاتے ہیں اور پرچے بھی پاس ہوجاتے ہیں۔

اس سے مجھے اپنی بات یاد آگئی اگرچہ ہمارا حال اس لڑکےسے کچھ بہتر ہی تھا لیکن پیرے اور مضمون کا فرق نہ اس وقت پتا تھا نہ بی کام کرنے تک ہی پتا چلا۔ اب آکر پتا چلا ہے کہ پیرے کا مطلب ایک ہی پیرے میں سب لکھنا ہوتا ہے اور مضمون کئی پیروں پر مشتمل ہوتا ہے۔ پیرا کیسے لکھنا ہے، مضمون کیسے لکھنا ہے یہ یونیورسٹی میں آکر پتا چلا ہے، سٹڈی سکلز نامی ایک مضمون میں ورنہ ککھ بھی نہیں پتا تھا۔

ہمارا حال کیا ہے اور ہمارے مستقبل کا حال کیا ہے۔ اور ہم ترقی کے دعوے کرتے ہیں۔

ابو شامل: تجدید و احیائے دین

ابوشامل — 2008-11-19T12:54:01+00:00

جو عالمِ ایجاد میں ہے صاحبِ ایجاد

ہر دور میں کرتا ہے طواف اس کا زمانہ

تقلید سے ناکارہ نہ کر اپنی خودی کو

کر اس کی حفاظت کہ یہ گوہر ہے یگانہ

اس قوم کو تجدید کا پیغام مبارک!

ہے جس کے تصور میں فقط بزمِ شبانہ

لیکن مجھے ڈر ہے کہ یہ آوازۂ تجدید

مشرق میں ہے تقلیدِ فرنگی کا بہانہ

حکیم الامت حضرت علامہ اقبال کئی دہائی قبل تجدید کے بارے میں یہ اشعار بیان کر گئے تھے جس میں جہاں تجدید کی اہمیت کو بیان کیا گیا ہے وہیں عالم اسلام میں، اُس وقت سے اب تک جاری، تجدید کے نعروں سے اسلام کا حلیہ بگاڑنے کی کوششوں کو بے نقاب بھی کیا ہے۔ اس اہم اور نازک موضوع پر علامہ کے ہمعصر مصنف سید ابو الاعلٰی مودودی نے ایک کتاب تحریر کی جس کا نام “تجدید و احیائے دین” تھا۔ کتاب میں تجدیدِ دین، مجدّدین، دین کے احیاء کے کام، مجددین کے کارناموں کو مختصراً بیان کرنے کے علاوہ تجدید اور تجدّد کے فرق، مجدد کامل کے مقام اور امام مہدی کی حیثیت کی بھی وضاحت کی گئی ہے۔ اس کتاب کی پہلی اشاعت کے بعد اس پر بہت اعتراضات کیے گئے اور ہر جانب سے سید مودودی کو ہدفِ تنقید بنایا گیا۔ اسی سلسلے میں ماہنامہ ترجمان القرآن میں بھی کئی قارئین نے سوالات کیے جن کے دیے گئے جوابات کو اشاعت پنجم میں کتاب کا حصہ بنا دیا گیا۔

کتاب کے دیباچہ میں ہی سید مودودی نے کتاب کے مقاصد کو اس طرح واضح کیا ہے:

اسلام کی اصطلاحی زبان کے جو الفاظ کثرت سے زبان پر آتے ہیں ان میں سے ایک لفظ “مجدد” بھی ہے ۔ اس لفظ کا ایک مجمل مفہوم تو قریب قریب ہر شخص سمجھتا ہے ، یعنی یہ کہ جو شخص دین کو از سرِ نو زندہ اور تازہ کرے وہ مجدد ہے ۔ لیکن اس کے تفصیلی مفہوم کی طرف بہت کم ذہن منتقل ہوتے ہیں ۔ کم لوگ جانتے ہیں کہ تجدیدِ دین کی حقیقت کیا ہے ، کس نوعیت کے کام کو “تجدید” سے تعبیر کیا جا سکتا ہے ، اس کام کے کتنے شعبے ہیں ، مکمل تجدید کا اطلاق کس کارنامے پر ہو سکتا ہے اور جُزوی تجدید کیا ہوتی ہے ۔ اسی ناواقفیت کا نتیجہ ہے کہ لوگ ان مختلف بزرگوں کے کارناموں کی پوری طرح تشخیص نہیں کر سکتے جن کو تاریخ اسلام میں مجدد قرار دیا گیا ہے ۔ وہ بس اتنا جانتے ہیں کہ عمر ابن عبد العزیز بھی مجدد، امام غزالی بھی مجدد، ان تیمیہ بھی مجدد، شیخ احمد سرہندی بھی مجدد اور شاہ ولی اللہ بھی مجدد، مگر ان کو یہ معلوم نہیں کہ کون کس حیثیت سے مجدد ہے اور اس کا تجدیدی کارنامہ کس نوعیت اور کس مرتبہ کا ہے ۔ اس ذہول اور غفلت کی ایک بڑی وجہ یہ بھی ہے کہ جن ناموں کے ساتھ “حضرت”، “امام”، حجۃ الاسلام”، “قطب العارفین”، “زبدۃ السالکین” اور اسی قسم کے الفاظ لگ جاتے ہیں ان کی عقیدت مندی کا اتنا بوجھ دماغوں پر پڑ جاتا ہے کہ پھر کسی میں یہ طاقت نہیں رہتی کہ آزادی کے ساتھ ان کے کارناموں کا جائزہ لے کر ٹھیک ٹھیک مشخص کر سکے کہ کس نے اس تحریک کے لیے کتنا اور کیسا کام کیا ہے ، اور اس خدمت میں اس کا حصہ کس قدر ہے ۔ عموماً تحقیق کی نپی تُلی زبان کے بجائے ان بزرگوں کے کارنامے عقیدت کی شاعرانہ زبان میں بیان کیے جاتے ہیں جن سے پڑھنے والے پر یہ اثر پڑتا ہے ، اور شاید لکھنے والے کے ذہن میں بھی یہی ہوتا ہے کہ جس کا ذکر کیا جا رہا ہے وہ فردِ کامل تھا اور اس نے جو کچھ بھی کیا وہ ہر حیثیت سے کمال کے آخری مرتبے پر پہنچا ہوا تھا۔ حالانکہ اگر اب ہم کو تحریکِ اسلامی کی تجدید و احیاء کے لیے کوئی کوشش کرنی ہے تو اس قسم کی عقیدت مندی اور اس ابہام و اجمال سے کچھ کام نہ چلے گا۔ ہم کو پوری طرح اس تجدید کے کام کو سمجھنا پڑے گا۔ اور اپنی پچھلی تاریخ کی طرف پلٹ کر دیکھنا ہوگا کہ ان بہت سی صدیوں میں ہمارے مختلف لیڈروں نے کتنا کتنا کام کس کس طرح کیا ہے ، ان کے کارناموں سے ہم کس حد تک فائدہ اٹھا سکتے ہیں ، اور ان سے کیا کچھ چھوٹ گیا ہے جس کی تلافی پر اب ہمیں متوجہ ہونا چاہیے ۔

اس کتاب کو برقیانے کے سلسلے میں بھرپور مدد پر میں برادر خاور بلال کا تہہ دل سے مشکور ہوں جنہوں نے کتاب کے مواد کی کمپوزنگ کے علاوہ اس کے لیے یہ خوبصورت ٹائٹل بھی تیار کیا۔

یہ کتاب منظرنامہ کے سلسلے “ایک بلاگر- ایک کتاب” کا حصہ ہے۔

مندرجہ ذیل ربط پر موجود ای-بک doc فارمیٹ میں ہے اور مکمل searchable ہے۔ جلد اس کا PDF ورژن بھی اپ لوڈ کر دیا جائے گا۔

“تجدید و احیائے دین” اس ربط سے ڈاؤن لوڈ کیجئے

کتاب خوبصورت نستعلیق فونٹ “علوی نستعلیق” میں تیار کی گئی ہے اس لیے مطالعے کے لیے یہی فونٹ انسٹال کرنے کی تجویز دی جاتی ہے۔ علوی نستعلیق یہاں سے ڈاؤن لوڈ کیا جا سکتا ہے۔

متعلقہ تحاریر

احساس مروت کو کچل دیتے ہیں آلات گزشتہ چند ماہ سے خالی الذہنی کی کیفیت طاری ہے...
سندھی کی تنصیب پوڙهي ٿئي نه زمين، جهونو ٿئي نه سج هن ٻنيءَ...
ما بعد جدیدیت کا چیلنج اور اسلام قسط 2 ما بعد جدیدیت (Post Modernism) کا چیلنج اور اسلام...

وارث: میر انیس کی چند رباعیاں

محمد وارث — 2008-11-19T12:43:57+00:00

کسی زمانے میں کہا جاتا تھا کہ بگڑا گویّا، قوّال بن جاتا ہے اور بگڑا شاعر مرثیہ گو۔ قوّالوں کے بارے میں تو کچھ نہیں کہہ سکتا لیکن میر ببر علی انیس نے اردو میں شاہکار مرثیے کہہ کر اس ضرب المثل کو ضرور غلط ثابت کر دیا ہے بلکہ بعض اردو نقادوں کے نزدیک تو وہ اردو کے سب سے بڑے شاعر ہیں، اور تو اور مولانا شبلی نعمانی کی بھی میر انیس کی شاعری کے متعلق رائے بہت بلند ہے۔

شاعری میر انیس کے خون میں رچی بسی تھی کہ انکے والد میر خلیق اور بالخصوص دادا میر حسن بہت بلند پایہ شاعر تھے۔ اسی لیے تو آپ نے کہا تھا۔

عمر گزری ہے اسی دشت کی سیّاحی میں
پانچویں پشت ہے شبّیر کی مدّاحی میں

میر انیس کا نام گو مرثیے کی وجہ سے ہے لیکن آپ نے بہت بلند پایہ رباعیات بھی کہی ہیں اور انہی میں سے چند لکھ رہا ہوں۔

(1)
رتبہ جسے دنیا میں خدا دیتا ہے
وہ دل میں فروتنی کو جا دیتا ہے
کرتے ہیں تہی مغز ثنا آپ اپنی
جو ظرف کہ خالی ہو صدا دیتا ہے

(2)
گوہر کو صَدَف میں آبرو دیتا ہے
بندے کو بغیر جستجو دیتا ہے
انسان کو رزق، گُل کو بُو، سنگ کو لعل
جو کچھ دیتا ہے جس کو، تُو دیتا ہے

(3)
کس منہ سے کہوں لائقِ تحسیں میں ہُوں
کیا لُطف جو گُل کہے رنگیں میں ہُوں
ہوتی ہے حلاوتِ سُخَن خود ظاہر
کہتی ہے کہیں شکر کہ شیریں میں ہُوں

(4)
کیا کیا دنیا سے صاحبِ مال گئے
دولت نہ گئی ساتھ، نہ اطفال گئے
پہنچا کے لحد تلک پھر آئے سب لوگ
ہمراہ اگر گئے تو اعمال گئے

(5)
سینے میں یہ دم شمعِ سحر گاہی ہے
جو ہے اس کارواں میں وہ راہی ہے
پیچھے کبھی قافلہ سے رہتا نہ انیس
اے عمرِ دراز تیری کوتاہی ہے

(6)
پہنچا جو کمال کو وطن سے نکلا
قطرہ جو گہر بنا عدن سے نکلا
تکمیلِ کمال کی غریبی ہے دلیل
پختہ جو ثمر ہوا چمن سے نکلا

(7)
خاموشی میں یاں لذّتِ گویائی ہے
آنکھیں جو ہیں بند، عین بینائی ہے
نے دوست کا جھگڑا ہے نہ دشمن کا فساد
مرقد بھی عجب گوشۂ تنہائی ہے

(8)
وہ موجِ حوادث کا تھپیڑا نہ رہا
کشتی وہ ہوئی غرق، وہ بیڑا نہ رہا
سارے جھگڑے تھے زندگی کے انیس
جب ہم نہ رہے تو کچھ بکھیڑا نہ رہا

(9)
عزّت رہے یارو آشنا کے آگے
محجوب نہ ہوں شاہ و گدا کے آگے
یہ پاؤں چلیں تو راہِ مولا میں چلیں
یہ ہاتھ جب اٹھیں تو خدا کے آگے

(10)
گُلشن میں پھروں کہ سیرِ صحرا دیکھوں
یا معدن و کوہ و دشت و دریا دیکھوں
ہر جا تری قدرت کے ہیں لاکھوں جلوے
حیراں ہُوں کہ دو آنکھوں سے کیا کیا دیکھوں

(11)
آدم کو عجَب خدا نے رتبا بخشا
ادنٰی کے لیے مقامِ اعلٰی بخشا
عقل و ہنر و تمیز و جان و ایمان
اِس ایک کفِ خاک کو کیا کیا بخشا

(12)
کیوں زر کی ہوَس میں دربدر پھرتا ہے
جانا ہے تجھے کہاں؟ کدھر پھرتا ہے؟
اللہ رے پیری میں ہوَس دنیا کی
تھک جاتے ہیں جب پاؤں تو سر پھرتا ہے

(13)
دنیا بھی عجب سرائے فانی دیکھی
ہر چیز یہاں کی آنی جانی دیکھی
جو آ کے نہ جائے وہ بڑھاپا دیکھا
جو جا کے نہ آئے وہ جوانی دیکھی

(14)
افسوس زمانے کا عجَب طَور ہوا
کیوں چرخِ کہن آج نیا دَور ہوا
بس یاں سے کہیں اور چلو جلد انیس
اب یاں کی زمیں اور، فلَک اَور ہوا

ShareThis

اردو لطائف: کونسی مچھلیاں

منتظم — 2008-11-19T10:34:15+00:00

سمندر کے ساحل پر ایک آدمی مچھلیاں پکڑ رہا تھا, اتنے میں تھانیدار ادھر آ نکلا اور آدمی کو ڈرا کر اس سے رشوت لینے کی کوشش کرنے لگا۔

تھانیدار “تمہیں پتہ ہے یہاں بغیر اجازت کے مچھلیاں پکڑنا جرم ہے؟ اب تو تمہارا چالان ہو گا اور میں تمہیں حوالات میں بند کر دوں گا”۔

آدمی “جناب میں مچھلیاں پکڑتا نہیں ہوں، یہ تو میری پالتو مچھلیاں ہیں، میں روزانہ یہاں آتا ہو، سیٹی بجاتا ہوں تو مچھلیاں باہر نکل آتی ہیں۔ میں ان کیساتھ تھوڑی دیر کھیلتا ہوں اور پھر واپس ایسے انہیں سمندر میں ڈال دیتا ہوں”۔

یہ کہ کر آدمی نے مچھلیاں سمندر میں پھینک دیں۔

تھانیدار “اچھا اب سیٹی بجا کر مچھلیوں کو دوبارہ بلاؤ”۔

آدمی “کونسی مچھلیاں؟”۔

اردو ماسٹر: تحریر کا ربط

عمار ابنِ ضیاء — 2008-11-19T08:54:33+00:00

آج ہم بلاگ پر لکھی جانے والی اردو تحریر کا یو آر ایل بہتر بنانے کا طریقہ جانیں گے۔ جب ہم بلاگ پر کسی تحریر کا عنوان اردو میں لکھتے ہیں تو اس کے نیچے ہی اس تحریر کا لنک ظاہر ہوجاتا ہے۔ مثال دیکھیں:

یہ عجیب و غریب زبان لکھی ہوئی ہے جس کا کوئی مطلب سمجھ نہیں آتا۔ یہ تحریر پوسٹ کرنے کے بعد جب آپ اس تحریر کو بلاگ پر دیکھیں گے تو براؤزر میں ویب ایڈریس یوں نظر آرہا ہوگا۔

لیکن جب ہم یہ لنک کسی ایڈیٹر میں کاپی کرنا چاہیں گے یا کسی اور جگہ اس کا ربط شامل کرنے کے لیے یہ یو آر ایل کاپی کریں گے تو ہمیں یہ کچھ یوں نظر آئے گا:

اسے مختصر اور پڑھنے کے قابل بنانے کے لیے ضروری ہے کہ جب ہم تحریر لکھیں تو ساتھ ہی پرمالنک بھی اپڈیٹ کریں:

تحریر کا عنوان دینے کے بعد جب پرمالنک ظاہر ہو تو ایڈیٹ پر کلک کریں۔

یہاں آپ اردو عنوان کا مناسب انگریزی ترجمہ یا رومن ہی میں لکھ دیں اور محفوظ کرلیں۔ یاد رکھیں کہ بڑے حروف لکھنے کا کوئی فائدہ نہیں ہوگا، خالی جگہ بھی مت چھوڑیں۔ اب آپ کا یو آر ایل پڑھنے کے قابل بن جائے گا۔

عمار ضیا: Chapter 27

عمار ابنِ ضیاء — 2008-11-19T07:51:22+00:00

ایک دلچسپ مگر بور کہانی۔۔۔۔۔۔

پہلا حصہ:
The Catcher in the Rye ڈھائی سو سے زائد صفحات پر مشتمل J. D. Salinger کا لکھا ہوا ایک ناول تھا جو جولائی 1951ء میں ریاست ہاے متحدہ میں شائع ہوا۔ اس ناول کے چھبیس باب تھے۔

The Catcher in the Rye اپنے مضامین کے باعث ایک بے حد متنازعہ ناول ثابت ہوا۔ دنیا کی کئی زبانوں میں اس ناول کا ترجمہ ہوا اور ایک اندازے کے مطابق اس کی 65 ملین سے زاید شمارے فروخت ہوچکے۔ ٹائم میگزین نے 1923ء سے 2005ء کے بیچ لکھے جانے والے 100 بہترین ناولز میں سے ایک اسے بھی شمار کیا۔

دوسرا حصہ:
جان لینن ایک مشہور موسیقار تھا جو The Beatles نامی میوزیکل بینڈ کے ساتھ پرفارم کرتا رہا۔ جان لینن نے بینڈ سے علیحدہ بھی پرفارم کیا۔

8 دسمبر 1980ء کو جان لینن کو ایک شخص نے پانچ گولیاں ماریں جن میں سے چار نشانے پر لگیں اور زیادہ خون بہ جانے کے باعث جان لینن جان بر نہ ہوسکا۔ اس کی موت کی خبر پھیلتے ہی سوگ کا سماں ہوگیا۔ دنیا بھر میں جان لینن کے مداحوں نے سخت رنج و الم کا اظہار کیا، تعزیتی ریلیاں نکالی گئیں۔ جان لینن کا قاتل اس وقت تک جاے وقوع پر موجود رہا جب تک اسے پولیس نے آکر گرفتار نہ کرلیا۔ یہ افسوسناک سانحہ نیو یارک سٹی کی The Dakota اپارٹمنٹ بلڈنگ کے باہر پیش آیا۔

تیسرا حصہ:
مارک ڈیوڈ 10 مئی 1955ء کو ٹیکساس میں پیدا ہوا۔ 14 سال کی عمر میں اس نے منشیات کا استعمال شروع کردیا۔ The Beatles بینڈ مارک ڈیوڈ کا سب سے پسندیدہ میوزیکل بینڈ تھا اور اس نے The Beatles کی کئی میوزک البمز خریدی تھیں۔ اس کے ایک دوست نے اسے مشہور ناول The Catcher in the Rye پڑھنے کا مشورہ دیا اور اس ناول کا مطالعہ مارک ڈیوڈ کی زندگی میں ایک اہم ترین موڑ ثابت ہوا۔

فلم Around the World in Eighty Days سے متاثر ہوکر مارک ڈیوڈ نے 1978ء میں پوری دنیا کا دورہ کیا جو چھ ہفتے پر مشتمل تھا جس میں وہ ٹوکیو، سیول، ہانگ کانگ، سنگاپور، بنکاک، دہلی، اسرایل، جینیوا، لندن، پیرس اور ڈبلن گیا۔ 6 دسمبر 1980ء کو وہ ہوائی سے نیویارک آگیا جہاں اس نے ایک بُک اسٹور سے The Cacher in the Rye کی ایک کاپی خریدی اور اس میں لکھا، “This is my statement” اور نیچے Holden Caulfield کے نام سے دستخط کیے ﴿جو کہ مذکورہ ناول کا ہی مرکزی کردار ہے﴾۔

مارک ڈیوڈ جان لینن کا بہت مداح تھا۔ جان لینن کا قیام ان دنوں اپنی بیوی کے ساتھ The Dakota اپارٹمنٹ بلڈنگ میں تھا۔

مارک ڈیوڈ نے کچھ دن وہیں گزارے جس دوران وہ جان لینن کے مداحوں اور اپارٹمنٹ کے سیکیورٹی گارڈز سے گفتگو کرتا رہا۔ جان لینن سے ملاقات کرنا، ہاتھ ملانا اور اس کے آٹوگراف لینا مارک کے لیے ایک بڑا سپنا تھا جس کے لیے وہ بے چینی سے انتظار کرتا رہا۔ 8 دسمبر کو شام پانچ بجے جان لینن اپنی بیوی کے ساتھ The Dakota اپارٹمنٹ سے نکلا اور اپنی لیموزین کی طرف بڑھا۔ وہ ریکارڈ پلانٹ اسٹوڈیوز ریکارڈنگ کے لیے جارہے تھے۔ اسی درمیان مارک ڈیوڈ آگے بڑھا اور جان لینن سے مصافحہ کیا۔ اس نے جان لینن کی تازہ ترین البم Double Fantasy پر اس کے دستخط لیے۔ فوٹوگرافر نے اس لمحے کو کیمرے کی آنکھ میں محفوظ کرلیا۔

بعد ازاں جان لینن ریکارڈنگ کے لیے چلا گیا لیکن مارک ڈیوڈ وہیں رکا رہا۔۔۔ اس وقت کا ذکر کرتے ہوئے وہ The Catcher in the Rye ہی سے ایک اقتباس پیش کرتا ہے:

“At that point my big part won and I wanted to go back to my hotel, but I couldn’t. I waited until he came back. He knew where the ducks went in winter, and I needed to know this”

رات پونے گیارہ بجے کے قریب لینن کی لیموزین واپس آگئی۔ جب جان لینن اور اس کی بیوی، مارک ڈیوڈ کو پیچھے چھوڑتے ہوئے عمارت کے داخلی برآمدے کی طرف بڑھے، سڑک پر کھڑے مارک ڈیوڈ نے ہوائی سے خریدے گئے اپنے ریوالور سے پانچ گولیاں فائر کیں جن میں سے چار گولیاں جان لینن کے کاندھے اور عقب میں لگیں۔ ایک گولی انسانی جسم کی بے حد اہم شریان، شہ رگ میں لگی جس کے سبب اس کا خون بہت بہ گیا۔ رات 11 بج کر 15 منٹ پر جان لینن کی موت کا اعلان کردیا گیا۔ اس کی عمر 40 سال تھی۔

مارک ڈیوڈ جاے وقوع پر ہی موجود رہا۔ اس نے ناول The Catcher in the Rye نکالا اور تب تک پڑھتا رہا جب تک پولیس نے پہنچ کر اسے گرفتار نہیں کرلیا۔ گرفتاری کے بعد پولیس کو اس نے ایک بیان میں یوں کہا کہ اسے یقین ہے کہ اس کا بڑا حصہ Holden Caulfield ﴿ناول کا مرکزی کردار/ راوی﴾ ہے جب کہ کچھ برائی ہے۔

مارک ڈیوڈ پر سیکنڈ ڈگری مرڈر کی فردِ جرم عائد کی گئی۔ فروری 1981ء میں مارک نے اپنے ہاتھ سے لکھا ایک بیان دی نیو یارک ٹائمز کو ارسال کیا جس میں اس نے ہر ایک کو The Catcher in the Rye پڑھنے کی ترغیب دیتے ہوے لکھا کہ یہ ایک غیر معمولی کتاب ہے جس میں کئی سوالوں کے جوابات موجود ہیں۔

مارک ڈیوڈ کے وکلاء نے کوشش کی کہ اسے خبطی قرار دلواکر رعایت دلوائی جاسکے لیکن 22 جون کو عدالت میں دورانِ سماعت مارک نے بیان دیا کہ خدا نے اسے اعترافِ جرم کا کہا ہے اور وہ اب اپیل نہیں کرے گا۔ 24 اگست کو دو نفسیاتی ماہرین نے عدالت میں مارک کی طرف سے پیش ہوکر معاملہ سنبھالنے کی کوشش کی لیکن مارک نے یہ سب پسند نہیں کیا۔ جب اس سے پوچھا گیا کہ کیا وہ کچھ کہنا چاہتا ہے تو وہ اٹھا اور اس نے The Catcher in the Rye سے ایک پیرا پڑھا۔ جج نے حکم دیا کہ اس کا نفسیاتی علاج جاری رکھا جائے اور اسے جیل بھیج دیا۔

1981ء سے مارک ڈیوڈ Attica Correctional Facility میں قید کاٹ رہا ہے۔

۔۔۔۔۔۔۔۔۔۔۔۔۔۔۔۔۔۔۔

ممکن ہے آپ کو یہ کہانی دلچسپ لگی ہو اور یہ بھی ہوسکتا ہے کہ آپ بور ہوکر سوچ رہے ہوں کہ یہ سب میں نے کیوں لکھا؟ کچھ دن پہلے کی بات ہے کہ میں رات کو گھر پر پاکستان کا کرکٹ میچ دیکھ رہا تھا ساتھ ساتھ چینلز بدل کر دیکھ رہا تھا کہ کہیں کچھ خاص آرہا ہو۔ چینل اسٹار موویز پر فلم Chapter 27 شروع ہورہی تھی۔ میں نے وہ دیکھنا شروع کی۔۔۔ بے حد بور اور عجیب سی فلم تھی لیکن میں اسے دیکھتا رہا اور دیکھتا ہی رہا۔۔۔ مجھے اندازہ ہوا کہ یہ کسی حقیقی واقعہ پر مشتمل ہے لہٰذا اگلے دن میں نے وکی پر تلاش کی اور بہت سا وقت اس فلم اور اس سے متعلقہ ساری کہانیاں دیکھتا رہا، پڑھتا رہا۔ مجھے یہ سب کچھ بے حد دلچسپ لگا۔ سوچا، کیوں نہ اس پر لکھا جائے۔ مجھے تو ایک بے کار سی فلم دیکھنے کے بعد بہت معلومات حاصل ہوئی، کیا آپ بھی ایسا ہی کرتے ہیں؟

thanks to english wikipedia

راشد کامران: اردو میں انگریزی کی ملاوٹ۔ پی آر آئی کی رپورٹ

راشد کامران — 2008-11-19T07:15:21+00:00

پبلک ریڈیو انٹرنیشنل یعنی پی آر آئی کے متعلق میں پہلے بھی لکھ چکا ہوں کہ آزاد خبروں کے حصول کا ایک بہت اہم ذریعہ ہے. پی آر آئی پر نشر ہونے والا ایک سلسلہ دی ورلڈ کے نام سے مشہور ہے جس میں دنیا بھر کی اہم خبروں کا ایک بہت ہی مفصل جائزہ نشر کیا جاتا ہے۔ آج 18 تاریخ کو ایک بہت ہی دلچسپ رپورٹ اردو میں انگریزی کی ملاوٹ کے حوالے سے نشر کی گئی۔ اس پروگرام کو یہاں سنا جاسکتا ہے اور آخر میں یہ ضرور بیان کریں کہ آیا آپ رپورٹ سے متفق ہیں یا کوئی اور نکتہ نظر رکھتے ہیں۔

اسما: Garam Chai ki Piyali Ho…

mE — 2008-11-19T06:29:01+00:00

AT work I try different combination when it comes to tea (chai) … just black tea. Tea with 2 heaped teaspoons of coffee in it. Medium colored black tea. Strong cup. Light milky tea. Strong 3-4 tea bags tea. Name it and I’ll give you a new combination of tea everyday.

Thanks god they are not re-hiring me as office boy yet.

When I reach home these days … the after-tea reminds me of so memories from not-so-old-times … a few years down the lane yet they seem so distant and so near. After putting the dinner plate off, bhai would shout for Chai Hojayay. And then we’ll fight daily that who’d do what. That was our ultimate family time. Ami and abu’s half half cups … our full huge mugs of tea. Oh yeah bhai’d make tea too kabhi kabhi. I’ll ask him o do half of teh work … either dum the tea and I’ll mix or do the opposite Sometime Ess (my eldest sis) would start blending coffee too. Deep in chilly winters, ami would make pink tea … and honestly that used to be THE yummiest and truest pink tea aka kashmiri chai I ever tasted. The shops sell just pink-colored tea in its name these days. Nothing can compete mom-cookeries ever … love you ama.

Ah ha and how can I forget the gajar ka halwas. Goodness, my mom used to make THE best gajjar ka halwa and gajrella too No one can beat that taste. Small things that you don’t even realize then becomes strongest of the memories when nothing remains the same. Nothing.

Winters are nostalgic. Seems like my last winters in my home these would be. Nostalgic with capital N.

چاء ہوئے تے بہت ہوئے پر اپناں دے نال ہوئے

Innit?

حکیم خالد: دنیا بھر میں آج(19نومبرکو) دائمی تنگی تنفسCOPD کا عالمی دن منایا جا رہا ہے۔

hakimkhalid — 2008-11-19T05:48:23+00:00

دنیا کے 600ملین افراد دائمی تنگی
تنفس کا شکار’ سالانہ تیس لاکھ اموات ہوجاتی ہیں

دنیا بھرمیںاموات کی چوتھی بڑی وجہ دائمی تنگی تنفس ہے:طبی ماہرین

پھیپھڑوں کے اس مرض کا سب سے بڑا سبب سگریٹ نوشی ہے:ڈاکٹر رفیق بشارت ‘قاضی ایم اے خالد

لاہور(نما ئندگان الیکٹرانک و پرنٹ میڈیا ) دنیا بھر میں آج(19نومبرکو) دائمی تنگی تنفسCOPD کا عالمی دن منایا جا رہا ہے۔ پاکستان سمیت دنیا بھرمیں سینے کے امراض میں خطرناک حد تک اضافہ ہو رہا ہے۔ورلڈ ہیلتھ آرگنائزیشن کے مطابق دائمی تنگی تنفس دنیا بھرمیںاموات کی چوتھی بڑی وجہ ہے۔اس مرض میں دنیا کے 600ملین افراد مبتلا ہیں جن میں سے ہرسال تیس لاکھ افرادہلاک ہو جاتے ہیں۔
سانس لینے میں دشواری کی مرضCOPDیعنی دائمی تنگی تنفس ‘پھیپھڑوں کی ایک مرض نہیں بلکہ کئی خطرناک دائمی امراض کے مجموعے کا نام ہے۔اس امر کا اظہار ایسوسی ایٹ پروفیسر آف میڈیسن ‘پی جی ایم آئی ‘ڈاکٹر رفیق احمد بشارت اور چیف ایگزیکٹو ہیلتھ پاک وہیلتھ میڈیا کنسلٹنٹ فزیشن قاضی ایم اے خالد نے COPD کے عالمی دن کے حوالے سے ذرائع ابلاغ سے بات چیت کے دوران کیا ۔
انہوں نے کہا کہ دائمی تنگی تنفس کی سب سے بڑی وجہ سگریٹ نوشی ہے۔ ماحولیاتی آلودگی ‘لکڑی ‘کوئلہ ‘اپلوں’کیمیائی مادوں اور گاڑیوں کا دھواں بھی اس مرض کا باعث بن سکتا ہے ۔’‘سی او پی ڈی’‘کی ابتدائی علامات میں سانس کی تنگی ‘مسلسل کھانسی ‘بلغم کا اخراج اوردوران مشقت سانس پھول جاناوغیرہ شامل ہے۔علاج نہ ہونے کی صورت میں مریض کی حالت دن بہ دن بگڑتی جاتی ہے اور معمول کے کاموں کے دوران بھی سانس لینے میں دشواری ہوتی ہے۔اس مرض کی تشخیص پھیپھڑوں کے فنکشن ٹیسٹ ‘’سپرومیٹری’’ سے کی جاتی ہے ۔COPDکی اگر بروقت تشخیص ہو کر علاج شروع ہوجائے تو مریض جلد شفایاب ہوجاتے ہیں۔لیکن اکثر اس سلسلے میں شعور کے فقدان کی وجہ سے بہت سے مریضوں کی تشخیص اس وقت ہوتی ہے جب ان کی مرض بہت بڑھ چکی ہوتی ہے۔ لہذادائمی تنگی تنفس سے متعلق عوام الناس میں آگاہی و راہنمائی کی انتہائی ضرورت ہے۔

ماہ رخ: فِش بریانی

Mah Rukh — 2008-11-19T04:45:00+00:00

تحریر: حجاب

اجزاء:

فِش ۔ 3 پاؤ۔بغیر کانٹے والی مچھلی، چوکور کٹی ہوئی بوٹیاں۔
چاول ۔آدھا کلو۔بھیگے ہوئے۔
پیاز درمیانی سائز کی 3 عدد ، باریک کٹی ہوئی ۔
ٹماٹر ۔ 3 عدد ۔
آلو ۔ چھوٹے سائز کے یا بڑے آلو ہوں تو ایک کے چار ٹکڑے بنا لیں۔
دہی ۔ 2 پیالی۔
سرخ پسی مرچ ۔ حسبِ ضرورت۔
مسٹرڈ پاؤڈر۔چوتھائی چائے کا چمچہ۔
لہسن ادرک پسا ہوا مکس پیسٹ۔3 کھانے کے چمچے۔
سفید زیرہ پاؤڈر۔ 1 چائے کا چمچہ۔
اجوائن۔آدھا چائے کا چمچہ۔
گرم مصالحہ ۔ 1 چائے کا چمچہ۔
ہلدی۔ 1 چائے کا چمچہ۔
دھنیا پاؤڈر ۔آدھا چائے کا چمچہ۔
ہری مرچ۔ 6 عدد۔
نمک ۔ حسبِ ضرورت۔
خشک میتھی کے پتے ۔2 کھانے کے چمچے۔
کریم یا مکھن ۔4 کھانے کے چمچے۔
آئل یا گھی حسبِ ضرورت۔

ترکیب:

پیاز کو گولڈن براؤن فرائی کرلیں۔
اب پیاز میں سارے مصالحے اور ایک چمچ میتھی کے پتے ڈال کر بھونیں،یہاں تک کہ ٹماٹر اور دہی کا پانی خشک ہوجائے اور پیاز اچھی طرح مکس ہوجائے۔
آلو اُبال لیں (سخت رہیں) آلو بھی گولڈن فرائی کر لیں۔
فِش کو صاف کرکے نمک ، پسی سرخ مرچ اور ہلدی لگا کر فرائی کرلیں۔
(اس کے لیئے نمک مرچ الگ سے استعمال کریں) اب تیار کیئے مصالحے میں آلو اور فِش ڈال کے آدھی پیالی پانی دیں ہلکے ہاتھ سے مصالحے میں فِش اور آلو مکس کریں۔
اور 5 یا 6 منٹ ہلکی آنچ پر پکائیں، آئل اوپر آجائے تو چولہا بند کردیں۔
بھیگے ہوئے چاولوں کو بوائل کرلیں۔
اب ایک تہہ چاول کی لگائیں ،اُس پر فِش ڈالیں ساتھ ہی میتھی کے پتے اور مکھن بھی ڈالیں۔
اسی طرح دوسری تہہ لگائیں اور فِش کے ساتھ باقی کے میتھی کے پتے اور مکھن ڈال کر ہلکی آنچ پر دم کے رکھ دیں۔
فِش بریانی تیار ہے۔
گرم گرم سلاد اور رائتے کے ساتھ سرو کریں۔

ماہ رخ: فرائیڈ فِش

Mah Rukh — 2008-11-19T04:42:00+00:00

تحریر: حجاب

اجزاء:

مچھلی ۔ ایک کلو ( فرائی کرنے کے لیئے ٹکڑے بنوا لیں )
لال مرچ پسی ہوئی ایک کھانے کا چمچ یا حسبِ ذائقہ۔
نمک حسبِ ذائقہ۔
پسا ہوا لہسن 2 کھانے کے چمچ ۔
سرکہ 3 سے 4 کھانے کے چمچ۔
اجوائن ایک چائے کا چمچ باریک پاؤڈر یا پیسٹ۔
بیسن آدھا پاؤ۔
آئل حسبِ ضرورت۔

ترکیب:

سب سے پہلے مچھلی کو نمک اور سرکہ لگا کر 15 سے 20 منٹ کے لیئے رکھ دیں اور پھر اچھی طرح دھو لیں۔
اب لہسن ،اجوائن ، نمک اور مرچ کو اچھی طرح مچھلی کے ٹکڑوں پر لگا دیں۔
اب ایک بڑی پلیٹ میں مصالحہ لگی مچھلی کے ٹکڑے اس طرح رکھیں کہ ٹکڑے آپس میں جڑے رہیں.
اب مچھلی کو کم از کم 2 گھنٹے کے لیئے فریج میں میرینیٹ ہونے کے لیئے رکھ دیں تا کہ مچھلی کا زائد پانی نکل جائے۔
اب بیسن میں حسبِ ذائقہ نمک اور تھوڑی سی پسی ہوئی لال مرچ ملا کر آمیزہ بنا لیں ۔
زیادہ گاڑھا آمیزہ نہ ہو۔آئل گرم کرکے مچھلی کے ٹکڑوں کو بیسن میں ڈبو کر درمیانی آنچ پر دونوں طرف سے گولڈن براؤن فرائی کرلیں۔
فرائیڈ فش تیار ہے۔

ماہ رخ: لبِ شیریں

Mah Rukh — 2008-11-19T04:37:00+00:00

تحریر: حجاب

اجزاء:

دودھ - ایک کلو۔

مکس فروٹ ٹِن۔

کریم - ایک پیکٹ۔

پاستہ سویّاں ( رنگ برنگی )پیکٹ کا چوتھائی حصّہ۔(اُبال لیں )

2 سیب باریک کٹے ہوئے۔

3 کیلے لمبائی میں باریک کاٹ لیں۔

2 آم باریک کاٹ لیں۔

عرقِ گلاب ایک چائے کا چمچ۔

کارن فلور ایک بڑا کھانے کا چمچ۔

چینی ایک کپ۔

ترکیب:

ایک کلو دودھ میں سے تھوڑا سا دودھ نکال کر باقی چولہے پر رکھ دیں.
جب دودھ اُبلنے کے قریب ہو تو جس دودھ کو الگ رکھا ہے اس میں کارن فلور حل کرکے چولہے پر رکھے دودھ میں ڈال دیں ۔
آہستہ آہستہ چمچ ہلائیں اور پھر چینی بھی شامل کر دیں۔
جب مناسب گاڑھا ہو جائے تو چولہا بند کردیں اور اس کو ٹھنڈا ہونے کے لیئے رکھ دیں.
ٹھنڈا ہونے پر اس میں فروٹ ٹِن میں سے آدھا فروٹ اور کریم شامل کر کے اچھی طرح بلینڈ کر لیں.
اب بچا ہوا آدھا فروٹ ٹِن کے فروٹ ، اُبالی ہوئی سویّاں ،سیب ، کیلا اور آم شامل کر کے ٹھنڈا ہونے کے لیئے رکھ دیں.
ٹھنڈا ہونے پر روح افزاء، کریم اور پستے بادام سے گارنش کریں۔

ماہ رخ: کریم کے سیخ کباب

Mah Rukh — 2008-11-19T04:27:00+00:00

تحریر: ماوراء

اجزاء:

خشک قیمہ (چربی، چکنائی اور پانی بالکل نہ ہو) : ایک کلو۔
گھی یا مکھن : چار سے پانچ کھانے کے چمچ
بالائی : آدھا کپ
کچا پپیتا یا بیکنگ پاؤڈر : تھوڑا سا۔
پسا ہوا گرم مصالحہ : ڈیڑھ چائے کا چمچ
ادرک : ایک کھانے کا چمچ
پیاز : دو عدد درمیانے سائز کے
ہری مرچیں : چار سے پانچ عدد
ہرا دھنیا : حسبِ منشاء
پودینہ : حسبِ منشاء
نمک اور سرخ مرچ : حسبِ ضرورت
زیرہ : تقریباً ایک چائے کا چمچ
گرم مصالحہ پسا ہوا : ایک چائے کی چمچ

ترکیب :

مکھن اور کریم کو چھوڑ کر سارے اجزاء قیمے میں مکس کر لیں۔
اور قیمہ گرائنڈ کر لیں کہ باریک ہو جائے۔
آخر میں مکھن اور کریم بھی شامل کر لیں۔
چاہیں تو آخر میں ہی باریک کٹا ہوا دھنیا، پودینہ اور ہری مرچیں ڈال دیں۔
اچھی طرح قیمے کو مکس کر کے کچھ دیر کے لیے رکھ دیں۔
کباب بنانے سے پہلے ایک بار پھر قیمے کو مکس کریں۔
اور سیخوں پر کباب بنا کر کوئلوں پر گرل کر لیں۔
ٹماٹر، ادرک اور پیاز کی چٹنی کے ساتھ پیش کریں۔

مکی: اردو حاذف 1.0

مکی — 2008-11-19T00:27:44+00:00

سرور سے فائلیں حذف کرنا ایک حقیقی مصیبت ہے.. یقیناً یہ ایک تھکا دینے والا کام ہے.. یہ عمل اس وقت اور بھی طویل اور تھکا دینے والا ہوتا ہے جب سرور سے کوئی ایسا فولڈر حذف کرنا ہو جس میں اور بھی بہت سارے فولڈر اور فائلیں ہوں.. اردو حاذف اسی مصیب کا حل [...]